番話 作者 陳雲 | 三文治

– 2012年11月27日星期二上午12:07 路過香港的行人天橋，都會遇到推銷攤檔或企街，在易拉架傍邊，不停向人講番話。網友去年說，這種番話，是她回港以來在公共場所聽到最刺耳的滋擾聲。 所謂番話，不是「見了唐人講番話，見了番人口啞啞」的番話，即並非唐話以外的番話，而是推銷員口中的番話，即是將「返」字轉讀為「番」的音：呢次介紹返畀你、今次優惠返你、有新貨返咗想講返你知……。 行到下一個街口，入了時裝店，又聽到：「小姐介紹返呀，有新貨返咗，啱嘅可以試返喎。」「呢件衫剩喺得返大碼，講返呢，減價貨冇得退。呢次睇唔啱，下次返嚟睇返呀囉。」 粵語的反、返、翻之類，都是古語的同音通假詞（同音字變調之後改變意義），但淪為惡性推銷，就好恐怖。明明三唔識七，初次見面，就硬說人家是返轉頭幫襯，營造虛偽的熟悉感。香港推銷員用的那個返字，是語言植入的蠱惑技術，要人返來幫襯，或返頭用。明明人家都未用過，他們就說「用返」、「試返」。明明未試過，就說「畀返你用」，好似來客已經用到好熟悉的樣子。這是惡性推銷用的心理洗腦技術。 如此惡性推銷，神憎鬼厭。可惜香港官商勾結，商家佬剝削市民的時間，無法無天，否則應該立法禁止店員做惡性推銷的對答的。我有一次買一盒月餅，不停聽到番話，我要出動粗言穢語呵斥店員，才可以停止她對我長達兩分鐘的惡性推銷：「我來買月餅，不是來給你推銷，浪費我的寶貴時間，浪費我的時間，要我倒貼錢，你做乜嘢生意噶？你當顧客死噶？咁長氣，唔好去開棺材鋪，同啲死人講嘢吖笨？」 前年在九龍塘地鐵站便利店遇到某店員，收錢的時候不斷介紹我買嘢，她也許被店主逼迫要講推銷話，便自己變成機械人，不斷滋擾顧客，互相報復。 地產霸權將香港變成妖魔世界。 也許有朝一日，結婚攝影服務公司會說：「小姐，我地有優惠畀返你，你嫁返一次啦。」殯儀館或骨灰龕公司會說：「先生，我地有優惠介紹番返你，你試返我地啲優惠啦。」